Акафист иконе Божией Матери "Милостивая" - 21 Мая 2012 - Блог - Молитвослов

Мой сайт

  • МОЛИТВОСЛОВ

Наш опрос

Оцените мой сайт
Всего ответов: 38

Статистика


Онлайн всего: 1
Гостей: 1
Пользователей: 0

Форма входа

Блог

Главная » 2012 » Май » 21 » Акафист иконе Божией Матери "Милостивая"
16:29
Акафист иконе Божией Матери "Милостивая"
"Милостивая"
 
Тропарь, глас 1

Притецем, людие, со дерзновением к Милостивой Царице Богородице, и умиленно воззовем к Ней: ниспосли, Владычице, милости Твоя богатыя, сохраняя во здравии и благоденствии грешныя рабы Твоя. Болящия исцели, скорбящия утеши и бедствующим помози. И сподоби нас, Премилостивая, благочестно житие сие земное скончати, христианскую непостыдную кончину получите и Небесное Царствие унаследовати. Град наш избави от всякаго злаго обстояния, ограждая Твоим Милостивым заступлением. Мирови мир даруй и спасение душам нашим испроси.
 
АКАФИСТ
 
Кондак 1

Избранней Богом от человеческого рода послужити воплощению Предвечнаго Слова, Преблагословенней Деве Богородице, достойно воспеваемой от ангел на небеси, мы грешнии на земли, дерзаем приносити хвалебное пение еже милостиво от нас приемши, Госпоже Всеблагая, от всяких бед временных и вечных нас свободи, да зовем Ти:
Радyйся, Милостивая христианом Помощнице.
 
Икос 1

Архангел Гавриил с небесе послан бысть от Тебе, Богородице к смиренному послушнику Горы Афонския в пустынней келии воспевавшему Ти хвалебныя песни пред святою Твоею иконою, да научит его пети песнь небесную, еюже славословят Тя ангели в Сионе горнем. Темже и мы дольнии, воспоминая таковое Твое о людех благопромышление, со благодарением вопием Ти сице:
Радyйся, достойно восхваляемая от архангел и ангел;
Радyйся, блажимая от всех небесных сил.
Радyйся, присноблаженная и пренепорочная;
Радyйся, Матерь Бога нашего.
Радyйся, честнейшая Херувим;
Радyйся, славнейшая без сравнения Серафим.
Радyйся, без истления Бога Слова рождшая;
Радyйся, воистину сущая Богородице.
Радyйся, величаемая на небеси и на земли;
Радyйся, воспеваемая горними и дольними.
Радyйся, едина благословенная в женах;
Радyйся, израстившая нам плод живота.
Радyйся, Милостивая христианом Помощнице.
 
Кондак 2

Видев послушник пустынный дивнаго пришельца в келию его пришедшаго и песнь пресладкую Тебе, Владычице, воспевшаго, неразуме в нем ангела быти, но зело усладися пением его небесным, и проси, да напишет ему словеса поемыя песни: егда же узре, яко под перстом его каменная дска умягчися, и пишемая словеса на ней углубишася яко на песце, позна в сем чудесное действо, и возопи рождшемуся от Тебе Богу Слову: Аллилуиа.
 
Икос 2

Разум Божественным песни открывая, рече Архангел послушнику, яко тако воспевают Тя Богородице, ангелов лицы в обителех горних, и повеле ему, да возвестит человеком словеса песни небесныя, и научит земнородныя ангелоподобно вопити Тебе:
Радyйся, Благодатная Марие;
Радyйся, яко Господь с Тобою.
Радyйся, Благословенная Дщи Отца Небеснаго;
Радyйся, Неискусобрачная Родительнице Бога Слова.
Радyйся, непорочное селение Духа Святаго;
Радyйся, зачатие несказанное явившая.
Радyйся, рождество нетленное показавшая;
Радyйся, Материю и Девою пребывшая.
Радyйся, во обою непорочно и свято Себе сохранившая;
Радyйся, ангелов чистотою Твоею превозшедшая.
Радyйся, горних умов непрестающее удивление;
Радyйся, человеческаго рода возвышение.
Радyйся, Милостивая христианом Помощнице.
 
Кондак 3

Радyйся, Силою Божиею Гавриил Архангел твердый камень в мягкий воск претвори, и на нем перстом своим написа словеса песни хвалебныя Тебе, Богородице, да вси познают великое чудо, и несомненно уверуют, яко тако воистину воспевают Тя горе силы небесныя, имже подражающе, поем величия Твоя, Дево, и в радости духовней вопием прославльшему Тя Богу: Аллилуиа.
 
Икос 3

Имея простоту душевную и непорочное сердце послушник смиренный, сподобися ангельския беседы и лицезрения чиноначальника горних сил, мы же, лукавством и злобою потемненнии, не смеем взирати на святую икону Твою, Владычице, и молим Ти ся прилежно: обрати ны от злоб наших десницею Твоею и научи нас во смирении и кротости духа глаголати Тебе:
Радyйся, Гору Афонскую освятившая Твоим благоволением;
Радyйся, холми и дебри ея исполнившая славою Твоих чудес.
Радyйся, ангельскаго явления сподобльшая пустыню ея;
Радyйся, обители иноческия, в ней умножившая во спасение душ человеческих.
Радyйся, подвизающимся в ней в посте и молитве обещавшая Твое заступление;
Радyйся, от треволнения моря житейскаго зде спасающая избранники Твоя.
Радyйся, милость Сына Твоего и Бога месту сему исходатайствовавшая до скончания века;
Радyйся, рай мысленный показавшая гору сию иноком пустыннолюбивым.
Радyйся, пристанище небурное соделавшая в ней всем ищущим спасения;
Радyйся, сих потребными к постническому житию снабжающая всегда любвеобильно.
Радyйся, жительствующим зде богоугодно подательнице благ временных и вечных;
Радyйся, ходатаице им Царствия Небеснаго.
Радyйся, Милостивая христианом Помощнице.
 
Кондак 4

Буря недоумения смути старца инока, егда услыша он песнь нову и пречудну во устех своего ученика, и узре дску каменну, чудотворно начертанную перстом неземным: егда же уведа о посещении дивнаго посетителя, Гавриилом нарекшагося, уразуме, яко той се есть, иже древле благовести Тебе, Дево, безсеменное зачатие Бога Слова. Темже величая величия Твоя, Царице горниих и дольних, воспеваше радостно ангелов и человеков Творцу: Аллилуиа.
 
Икос 4

Слышавше о посещении Архангелом иноцы Горы Афонския, стекахуся видети дску, чудотворно начертанную письменами песни небесныя, и воспеваху сию благоговейно пред святою иконою Твоею, Владычице, пред Неюже воспет Ю Архангел. Приими Всеблагая и наша пред нею усердно приносимыя Тебе молитвы, с пением таковым:
Радyйся, яко о Тебе радуется ангельский собор;
Радyйся, яко о Тебе торжествует человеческий род.
Радyйся, на руку Твоею носившая Предвечное Слово;
Радyйся, нетесно вместившая во чреве Твоем Творца небесе и земли.
Радyйся, Создателю Твоему плоть заимодавшая;
Радyйся, краснейшаго паче сынов человеческих воплотившая.
Радyйся, поставе красный, одежду плоти Христовы исткавший;
Радyйся, от кровей Твоих девственных порфиру Царя царей составльшая.
Радyйся, девства похвале;
Радyйся, матерей славо.
Радyйся, в рождестве девство сохраншая;
Радyйся, рождество с девством совокупльшая.
Радyйся, Милостивая христианом Помощнице.
 
Кондак 5

Боговидец Моисей иногда на каменных скрижалех Закон Божий начертанный на Горе Синайстей получи, иноцы же Горы Афонския песнь небесную во славу Богоматери на дсце каменней начертанную от Архангела прияша, и сим наученнии, ангельское славословие Тебе, Пречистая, воспеша, зовуще тако благоволившему о них Триединому Богу: Аллилуиа.
 
Икос 5

Видевше начальницы Горы Афонския чудо велие в явлении Архангеловом и песни новой, всей Церкви Христовой явленное, деку чудотворно начертанную письменами песни, препроводиша к царю и патриарху Византии, во уверение истины преславнаго сего чудесе: тии же радостно прияша ю, яко залог благоволения небеснаго, и во всей Церкви Православной узакониша воспевати песнь ангельскую в похвалу Тебе, Богородице, зовуще Ти во умилении глубоцем сице:
Радyйся, преукрашенная лепотами всех добродетелей, Дево;
Радyйся, Невесто Неневестная, сияющая девства чистотою.
Радyйся, возрастившая цвет неувядаемый, Христа;
Радyйся, раю словесный, древо жизни посреде имущий, Пресладкаго Иисуса.
Радyйся, сене небесная, от зноя старастей нас сохраняющая;
Радyйся, покрове миру, ширший облака.
Радyйся, древо благосеннолиственное, прохладу спасительную всем подающее.
Радyйся, источниче воды живыя, от неяже пиющии ктому не умирают.
Радyйся, Судии Праведнаго умоление;
Радyйся, грехов наших прощение.
Радyйся, во славе небесней одесную Бога пребывающая;
Радyйся, земнородных милосердием Твоим не оставляющая.
Радyйся, Милостивая христианом Помощнице.
 
Кондак 6

Проповедует Святая Церковь величие чудес Твоих, Марие Богородице, и светло красуется воспевая Ти песнь ангельскую, чудесно от небес на землю принесенную чиноначальником горних сил и Твоим изрядным служителем Гавриилом: с нимже помолися, Госпоже Пречистая, к Сыну Твоему и Богу, да незыблему во благочестии и православии сохранит Он Церковь Свою, и посрамит вся возстания еретическая, нас же, верных чад ея, сподобит неосужденно воспевати Ему: Аллилуиа.
 
Икос 6

Возсияла еси многими лучами чудес от Милостивыя иконы Твоей, Владычице, и сими всю Гору Афонскую облагодатствовала еси благоутробно: милости бо Твоея струи, неоскудно всем требующим от нея источаеши, Дево, и всех подвизаеши звати Тебе:
Радyйся, Радосте наша святая, иконою Твоею нас присно утешающая;
Радyйся, заступнице наша благая, на помощь к нам всегда ускоряющая.
Радyйся, залог спасительный нам в иконе Твоей даровавшая;
Радyйся, Афонскую Гору ею зело прославльшая.
Радyйся, надеждо наша известная;
Радyйся, упование наше непостыдное.
Радyйся, скорбей наших утешение;
Радyйся, печалей наших утоление.
Радyйся, веры православныя утверждение;
Радyйся, неверия посрамление.
Радyйся, любве Божественныя явление;
Радyйся, чудес преславных совершение.
Радyйся, Милостивая христианом Помощнице.
 
Кондак 7

Хотящим жати спасение в пустынях Горы Афонския, Милостивая Покровительница и Помощница являешися Мати Божия, и присно ходатайствуеши за них к Сыну Твоему и Богу: аще бо кто тамо и падет в некое согрешение, немощию плоти смущаем, Тобою востание получает во спасение, яко всем хощеши спастися и в разум истины приити жительствующим в жребии Твоем, и немолчно воспевающим Христу, Царю и Богу: Аллилуиа.
 
Икос 7

Ново небо и нова земля уготованы Сыном Твоим и Богом, любящим Его, Госпоже Всеблагая, к нимже стяжахом Тя Путеводительницу и Наставницу, аще токмо внимаем внушением Твоим Божественным. Молим Тя Царице Всемилостивая, не попусти нас погибнути в дебрех греховных, но приведи нас стезею правою в страну света и радости вечныя, да Тебе вопием хвалебно:
Радyйся, Сиона горняго первейшее украшение;
Радyйся, обителей дольних присноготовое заступление.
Радyйся, земле благая, клас спасительный миру израстившая;
Радyйся, ниво неоранная, оплодотворенная Духом.
Радyйся, огнь Божества во чрево Твое приемшая;
Радyйся, глад падшаго человечества Хлебом Жизни утолившая.
Радyйся, Херувимскаго Царя престоле;
Радyйся, Серафимскаго Владыки палато, преукрашенная чистотою.
Радyйся, храме одушевленный Триипостаснаго Бога;
Радyйся, вместилище Божества.
Радyйся, Милостивая христианом Помощнице.
 
Кондак 8

Странное и преславное явление Архангела, на Горе Афонстей иногда бывшее, смотрение бысть Божественное, имже прославися препетое имя Твое, Марие Богородице, и все вернии научишася ангелоподобно воспевати Тя, Херувимов честнейшую и Серафимов славнейшую Матерь Бога нашего, о нейже радуется всякая тварь, и род человеческий благодарно взывает ко Господу: Аллилуиа.
 
Икос 8

Все упование наше на Тя возлагаем, Мати Божия, и в скорбех наших к святей иконе Твоей усердно притекаем, чающе от нея утешение благодатное получити, Твоим милостивым к нам участием, Всеблагая. Помози нам Владычице, с терпением и благодарением всякия скорби переносити, и вместо ропота малодушнаго, благоумиленно взывати Тебе:
Радyйся, всех скорбящих Радосте;
Радyйся, всех печальных Утешение.
Радyйся, труждающихся и обремененных сладкий покое;
Радyйся, болезнующих и огорченных живительная отрадо.
Радyйся, в час скорбных недоумений мысль благую на сердце полагающая;
Радyйся, во дни уныния надеждою вечных благ воодушевляющая.
Радyйся, искушаемым руку помощи Твоея простирающая;
Радyйся, гнев Божий от глав наших отводящая.
Радyйся, мирное устроение обуреваемым напастьми подающая;
Радyйся, во благих желания наша дивно исполняющая.
Радyйся, терпеливых страдальцев дарами благодатными увенчивающая;
Радyйся, иноков благоподвизающихся блаженства райскаго сподобляющая.
Радyйся, Милостивая христианом Помощнице.
 
Кондак 9

Все ангели небеснии немолчными похвалами Тя ублажают Царице и Владычице всея твари, мы же земнии и перстнии кую похвалу достойную принесем Ти, Всепетая; обаче надеющиеся на милосердие Твое неисчетное, любовию к Тебе понуждаеми, поем чудеса Твоя, проповедуем благодеяния Твоя, славословим имя Твое, и усердно припадая к многоцелебней иконе Твоей, рабски вопием изображенному на ней вкупе с Тобою, Богомладенцу Христу: Аллилуиа.
 
Икос 9

Ветий риторския глаголы, недовольны к пению чудес Твои, Богородице, обаче Благая сущи, веру нашу, вместо риторскаго благословесия, милостиво приими, веси бо и любовь нашу, еюже сердца наша к Тебе исполнены. Темже благоутробно услыши нехитростныя наша песни, имиже дерзаем благохвалити Тя сице:
Радyйся, сопрестольное Отцу Слово в ложеснах Твоих вместившая;
Радyйся, Свет незаходимый рождшая.
Радyйся, жизнь вечную миру даровавшая рождеством Твоим;
Радyйся, ангельскаго Царя, яко младенца на руку Твоею носившая;
Радyйся, граде одушевленный присноцарствующаго;
Радyйся, скиние освященная Живаго Бога.
Радyйся, нижняя сочетавшая с вышними;
Радyйся, Мироположнице, Божественнаго мира преисполненная.
Радyйся, добрых виновная;
Радyйся, злых пременение.
Радyйся, оружие на враги всекрепкое;
Радyйся, щите верных несокрушимый.
Радyйся, Милостивая христианом Помощнице.
 
Кондак 10

Спасительное прибежище от сует мира прелестнаго, явися жребий Твой земный, святая воистину Гора Афонская, Богородице Дево, освященная многими Твоими чудесы, преисполненная причастными благодати Твоими иконами, и населенная иноками, верно служащими в преподобии Сыну Твоему и Богу, Егоже умоляти не престай, Всеблагая, не отступна пребывает благодать Его от места сего, Тобою и возлюбленнаго, на немже от лет древних поется Ему хвалебная песнь: Аллилуиа.
 
Икос 10

Стена еси заступления девственным ликостояниям, Преблагословенная Дево, и столп крепок от лица вражия всем подвижником чистоты: Тебе бо дадеся велия сила, темныя адския силы побеждати, и от искушений их душепагубных человеки избавляти наипаче тех, иже целомудренно и свято на земли пребывают. Сего ради девства рачители согласно Тебе зовут:
Радyйся, чистотою сияющая паче солнца;
Радyйся, девства начало и освящение.
Радyйся, крине, облагоухавший падшее человечество;
Радyйся, во смирении Твоем осененная благоволением Всевьшняго.
Радyйся, верная рабо Господня;
Радyйся, яко Тя блажат вси роди.
Радyйся, столпе утверждения всем подвижником чистоты;
Радyйся, венче доброты, исплетенный десницею Вседержителя.
Радyйся, знамение Божия к людем благоволения;
Радyйся, грешных к Богу дерзновение.
Радyйся, одеянная в светлую ризу милостей и щедрот;
Радyйся, преисполненная сострадания и любве к христианскому роду.
Радyйся, Милостивая христианом Помощнице.
 
Кондак 11

Пение наше, аще и тмочисленное бы было, не довлеет к достойному прославлению многих милостей Твоих и щедрот, Преблагословенная Матерь Господа нашего, имиже непрестанно благодетельствуеши роду нашему: обаче да не неблагодарни явимся пред Тобою, Благодетельнице наша, по силе нашей благодарственныя песни Тебе приносим с верою и любовию, и прославляя неисчетная чудотворения Твоя, вопием Верховному Творцу чудес Богу: Аллилуиа.
 
Икос 11

Светоподательными лучами чудес икона твоя "Милостивая", Владычице, на святей Горе Афонстей немерцаемо сияет, и весь мир православный благодатно просвещает. Сего ради грядут к ней от лет древних на поклонение православных соборы, благоумиленно воспевая пред нею благохваления Ти таковая:
Радyйся, Царя Христа миру явившая;
Радyйся, на иконе Твоей вкупе с Ним изображенная.
Радyйся, клеще таинственная, Исаиею провиденная;
Радyйся, Купино неопалимая, боговидцем Моисеем предзримая.
Радyйся, руно орошенное Гедеона;
Радyйся, чаще приосененная Аввакума.
Радyйся, двере затворенная Иезекииля;
Радyйся, горо несекомая Даниила.
Радyйся, многажды от пророк предвозвещенная;
Радyйся, пророческих речений сбытие принесшая.
Радyйся, Милостивая христианом Помощнице.
 
Кондак 12

Благодати причастная Твоя икона, Богородице Дево, яко утварь драгая Церкви Христовой подадеся от щедрот Твоих, Всеблагая, в нейже обещалася еси с нами быти до скончания века, рекши о первописанней твоей иконе: "с нею благодать Моя и сила!" Веруем Всепетая, яко не оскудеет глагол Твой сей и ныне, в иконе Твоей святей на всяцем месте, идеже верно поется Сыну Твоему и Богу хвалебная песнь: Аллилуиа.
 
Икос 12

Поюще чудеса Твоя, Богородице, припадаем усердно к милостивей и чудодейственней иконе Твоей, лобызаем ю с сердечною любовию, и яко присно сущей Ти с нами молим Ти ся прилежно: воззри на ны милосердием Твоим, Мати Божия, и якоже Тя зрим ныне на иконе изображенную, тако сподоби нас узрети Тя в час грозный смертный, от руки диаволи нас исхищающую и в Царствие Христово приводящую ны, державною десницею Твоею, да Тебе благодарственно взываем:
Радyйся, по Бозе крепкое нам прибежище и покрове;
Радyйся, матерними щедротами Твоими весь мир христианский объемлющая.
Радyйся, во всех добродетелех верныя утверждающая;
Радyйся, благую христианскую кончину ублажающим Тя подающая.
Радyйся, от власти лютаго миродержца уповающия на Тя избавляющая;
Радyйся, на мытарствах воздушых славящия Тя заступающая.
Радyйся, вратарнице Божественная, врата райския милостиво нам отверзающая;
Радyйся, Царствие Горнее любящим Тя ходатайствущая.
Радyйся, во славе небесней приседящая Сыну Твоему и Богу;
Радyйся, созерцати славу Его Божественную чтущия Тя сподобляющая.
Радyйся, телес наших здравие
Радyйся, душ наших спасение.
Радyйся, Милостивая христианом Помощнице.
 
Кондак 13

О Всепетая Мати, рождшая святых Святейшее Слово, от ангел певаемая на Небеси, и от человек славимая на земли! Приими милостиво сие малое моление наше, и даруй телесное здравие и душевное спасение всем, верно восхваляющим Тя, и поющим о Тебе Триединому Богу: Аллилуиа.

Этот кондак читается трижды, затем икос 1 и кондак 1
 
Молитва
О Пресвятая и преблагословенная Мати Господа, Бога и Спаса нашего Иисуса Христа, Милостивая Богородице и Приснодево Марие! Припадая к святей и чудотворней иконе Твоей, смиренно молимся Тебе, Благой и Милосердой Заступнице нашей: вонми гласу грешных молений наших, не презри воздыханий от души, виждь скорби и беды нас обышедшия, и яко любвеобильная воистину Мати потщися на помощь нам безпомощным, унылым, во многия и тяжкия грехи впадшим и присно прогневляющим Господа и Создателя нашего, Егоже умоли, Предстательнице наша, да не погубит нас со беззаконими нашими, но явит нам человеколюбную Свою милость. Испроси нам, Владычице, у благости Его, телесное здравие и душевное спасение, благочестное и мирное житие, земли плодоносив, воздуха благорастворение, дожди благовременны и благословение свыше на вся благая дела и начинания наша, и якоже древле призрела еси милостиво на смиренное славословие послушника Афонскаго, воспевавшаго Ти песнь хвалебную пред Пречистою иконою Твоею, и послала еси к нему Архангела Гавриила научити его пети песнь небесную, еюже славословят Тя ангели горе, сице приими благоутробно и наше ныне усердно приносимое Тебе молитвословие, и принеси е Сыну Твоему и Богу, да милостив будет Он нам грешным, и пробавит милость Свою всем чтущим Тя и с верою покланяющимся Святому Образу Твоему. О Царице Всемилостивая, Мати Божия Всеблагая, простри к Нему Богоносныя Твои руки, имиже Его, яко младенца носила еси, и умоли Его вся ны спасти и избавити погибели вечныя. Яви нам, Владычице, Твоя щедроты: болящия исцели, скорбящия утеши, бедствующим помози: благопоспеши всем нам носити иго Христово в терпении и смирении, сподоби нас благочестно житие сие земное скончати, христианскую непостыдную кончину получити, и Небесное Царствие унаследити, Матерним ходатайством Твоим к рождшемуся от Тебе Христу Богу нашему, Емуже со Безначальным Его Отцем и Пресвятым Духом, подобает всякая слава, честь и поклонение, ныне и присно, и во веки веков. Аминь.
 
 
 
 
Категория: Акафисты Божией Матери | Просмотров: 309 | Добавил: admin | Рейтинг: 0.0/0
Всего комментариев: 0

Поиск

Календарь

«  Май 2012  »
ПнВтСрЧтПтСбВс
 123456
78910111213
14151617181920
21222324252627
28293031

Архив записей

Друзья сайта

  • Ваше здоровье
  • Ваш Травник
  • Обереги-Заговоры
  • Травы и растения
  • Мебель для Вас!